بڕیارە سێ ڕێکخراوی کۆمەڵگای مەدەنی لە هەرێمی کوردستانی عێراق پڕۆژەیەکی هاوبەش ئەنجام بدەن بۆ پەرەدان بە خوێندەواریی میدیایی Media Literacy و بەرەنگاربوونەوەی زانیاری هەڵە و هەواڵی چەواشە لە هۆکانی ڕاگەیاندن و پێگە ئەلیکترۆنییە کۆمەڵایەتیەکان. بۆ ئەو مەبەستە ڕۆژی ٢٥ی تشرینی یەکەمی ٢٠٢٣ رێکخراوەکانی میترۆ بۆ داکۆکیکردن لە ڕۆژنامەنووسان METRO و بەدیل بۆ دیبەیت BOD و دامەزراوەی بیرکردنەوەی ڕەخنەیی CTF یاداشتانەمەکی لێکگەیشتنیان لە شاری سلێمانی بە ئامادەبوونی نوێنەرانی هەر سێ ڕێکخراو ئیمزاکرد. بڕیارە پڕۆژەکە لە چەند هەفتەی داهاتودا بکەوێتە بواری جێبەجێکردن و کۆمەڵێک ڕاهێنەر لە زانکۆ و بەشە ئەکادێمییە پەیوەندیدارەکان ئامادەبکات لە بواری پەروەردەی میدیایی و هەڵسەنگاندنی ڕەخنەیی بۆ هەواڵ و پەیامە بڵاوکراوەکان لە هۆکانی ڕاگەیاندندا. هاوکات بڕیارە کەمپەینێکی میدیایی هاوبەش لە وێبسایتی هەر سێ ڕێکخراو و پێگە کۆمەڵایەتیەکاندا ڕابگەیەنرێت بۆ هۆشیارکردنەوەی گشتی لەو بارەیەوە.
